ប្រទេសមីយ៉ាន់ម៉ា ត្រូវការច្បាប់សេវាកម្មអចលនទ្រព្យ ដើម្បី ជំរុញទំនុកចិត្តជាសាធារណៈនៅក្នុងវិស័យនេះ និងដើម្បីអនុញ្ញាតឲ្យអ្នកអនុវត្តសហការ និងប្រកួតប្រជែងជាមួយសមភាគីក្នុងតំបន់។ នេះបើតាមការបង្ហាញតាមទិន្នន័យរបាយការណ៍។
ទោះជាយ៉ាងណាគណៈកម្មការពិសេស ដែលមានភារកិច្ចវាយតម្លៃតម្រូវការកំណែទម្រង់ច្បាប់ បាននិយាយថា សំណើសេចក្តីព្រាងច្បាប់ដែលបានដាក់ជូនដោយសមាគមសេវាកម្មអចលនទ្រព្យ ប្រទេសមីយ៉ាន់ម៉ា (MRESA) ដែលជាស្ថាប័នសាខារបស់ UMFCCI គួរតែបានការសរសេរកែសម្រួលឡើងវិញ។
ការថ្លែងឡើងនៅក្នុងសន្និសីទកាសែតមួយកាលពីថ្ងៃទី១២ ខែកញ្ញា មន្ត្រីមកពី MRESA និយាយថា ការដាក់ឲ្យអនុម័តនៃច្បាប់ដែលធ្វើនិយ័តកម្មទៅលើវិស័យរបស់ពួកគេអាចនឹងកែលម្អស្តង់ដារនៃជំនាញវិជ្ជាជីវៈ ព្រមទាំងផ្គត់ផ្គង់ជួយដល់ឈ្មួញកណ្តាល ដែលកំពុងមានចំនួនកើនឡើងកាន់តែខ្លាំងនៅក្នុងប្រទេសអាស៊ានផ្សេងៗទៀត។
លោក U Khin Maung Than ប្រធាន MRESA បានថ្លែងថា ៖ «សេវាភ្នាក់ងារអចលនទ្រព្យ និងអតិថិជន ត្រូវការក្របខណ្ឌ គោលនយោបាយដើម្បីជួយធានាដល់ការធ្វើអាជីវកម្មប្រកបដោយសុចរិតភាព។ ប្រទេសហ្វីលីពីន មានច្បាប់ស្តីពីសេវាកម្មអចលនទ្រព្យ ហើយប្រទេសសិង្ហបុរី ក៏មានច្បាប់ស្តីពីភ្នាក់ងារអចលនទ្រព្យ ដូច្នេះទើបនាំឲ្យទីភ្នាក់ងារ ភ្នាក់ងារ និងឈ្មួញកណ្តាលនៅក្នុងប្រទេសជាសមាជិកអាស៊ានទាំងអស់នោះ ប្រកបវិជ្ជាជីវៈ ដែលមានអាជ្ញាប័ណ្ណត្រឹមត្រូវ ដែលទទួលបានទំនុកចិត្តពីសាធារណជន»។
MRESA បានថ្លែងថា ច្បាប់បច្ចុប្បន្ន ដូចជាច្បាប់ស្តីពីការផ្ទេរទ្រព្យសម្បត្តិ និងច្បាប់ស្តីពីភតិបតី និងភតិកៈ ដែលធ្វើនិយ័តកម្ម ទៅលើវិស័យអចលនទ្រព្យ ប៉ុន្តែបែរជាខ្វះខាតក្នុងការការពារសិទ្ធិភ្នាក់ងារ, អ្នកទិញ, អ្នកលក់, ព្រមទាំងការផ្តល់ជានីតិវិធីក្នុងការដោះស្រាយទំនាស់។
យោងតាមសំដីរបស់លោក U Than អនុប្រធាន MRESA បានឲ្យដឹងថា ៖ «វិធីតែមួយគត់ក្នុងការដោះស្រាយទំនាស់គឺត្រូវពឹងផ្អែកទៅលើកិច្ចសន្យាទិញលក់អចលនវត្ថុ ប៉ុន្តែវិធីនេះមិនគ្រប់គ្រាន់នោះទេ។ វាដល់ពេលដែលយើងត្រូវមានច្បាប់មួយ ដែលប្រទេសដទៃទៀតមានរួចទៅហើយ»។
សមាគមវិស័យអចលនទ្រព្យ បានថ្លែងថា ពួកគេបានដាក់ជូននូវសំណើពង្រាងច្បាប់ទៅគណៈកម្មការនៃសភា ដើម្បីសុំការត្រួតពិនិត្យសារឡើងវិញ។
លោក យូ កូកូ ណែង ជាអនុប្រធានគណៈកម្មការកិច្ចការនីតិកម្ម និងករណីពិសេស បានពោលថា មានការព្រមព្រៀងរួចទៅហើយថានឹងតម្រូវឲ្យមានច្បាប់ថ្មីដើម្បីគ្រប់គ្រងវិស័យអចលនទ្រព្យ ប៉ុន្តែក៏តម្រូវឲ្យមានការពិគ្រោះយោបល់ បន្ថែមទៀតជាមួយសមាគមនៃវិស័យអចលនទ្រព្យផងដែរ។
«ពួកយើងបានជួបប្រជុំជាមួយនឹងសមាគមបីរួចទៅហើយ ដូចជា គណៈកម្មាធិការអភិវឌ្ឍទីក្រុងយ៉ាំងហ្គោន ទីក្រុងម៉ានដាឡេ និងណេពិដោរ ក្រសួងសំណង់ ព្រមទាំងអគ្គមេធាវី ដើម្បីធ្វើការពិភាក្សាទាក់ទិននឹងការព្រាងច្បាប់នេះ»។ នេះបើតាមសម្តីរបស់លោកបានប្រាប់កាសែត Myanmar Times។
សេចក្តីសម្រេចរបស់គណៈកម្មការ បានទទួលនូវប្រតិកម្មវិជ្ជមានពីសំណាក់សមាគមវិស័យអចលនទ្រព្យ ដែលជាសាខា UMFCCI ពីរទៀត គឺសមាគមសហគ្រិនអចលនទ្រព្យ Yangon (YREEA) និង សមាគមសេវាអចលនទ្រព្យ Mandalay Real Estate Service Association។
លោក U Saing Kong Naung ប្រធាន YREEA បានថ្លែងថាលោកសង្ឃឹមថា ការពិគ្រោះយោបល់របស់គណៈកម្មការទៅថ្ងៃអនាគតនឹងមានភាពទូលំទូលាយដោយរួមបញ្ចូលសមាគមដទៃទៀតឲ្យបានច្រើនជាងមុន។
លោកបន្តថា ៖ «ច្បាប់មិនអាចត្រូវបានព្រាងឡើងដោយ MRESA តែឯកឯងនោះទេ មានសមាគមបីហើយ ដែលបានទទួលអាជ្ញាប័ណ្ណស្របច្បាប់» ក្នុងនោះមានឈ្មួញកណ្តាល ឯកជន និងអ្នកជំនាញក៏អាចបញ្ចូលទៅក្នុងការពិគ្រោះយោបល់ផងដែរ។
«នៅពេលដែលមានការយល់ព្រមពីគ្រប់អាជ្ញាធរដែលពាក់ព័ន្ធ គណៈកម្មការនឹងបង្កើតឲ្យមាននូវគណៈកម្មាធិការច្បាប់រួមមួយ ក្នុងការធ្វើសេចក្តីព្រាងច្បាប់ដើម្បីដាក់ជូនទៅសភាសហគមន៍»។ នេះបើតាមសម្តីរបស់លោក U Ko Ko Naing។
មេធាវីរបស់ MRESA គឺអ្នកនាង Daw Khin Aye Mu បានពោលថា ការដាក់ជូននូវពង្រាងនៃសេចក្តីស្នើច្បាប់របស់សមាគមវិស័យអចលនទ្រព្យ គឺជាការខិតខំប្រឹងប្រែងមួយរបស់សមាគមឲ្យមានភាពសកម្ម ហើយវាមិនមែនជាចេតនារបស់ពួកគេ ក្នុងការមិនរួមបញ្ចូលនូវសមាគមដទៃទៀតនោះទេ។
អ្នកនាងបានបន្ថែមថា ៖ «ពួកយើងកំពុងធ្វើអ្វីដែលពួកយើងគិតថាល្អបំផុតសម្រាប់វិស័យនេះ»៕
http://www.postkhmer.com/