ការរីកចម្រើនរបស់ទីក្រុងភ្នំពេញក្នុងរយៈពេលប៉ុន្មានឆ្នាំចុងក្រោយនេះបានធ្វើឲ្យរាជធានីនេះកាន់តែរីកធំជាងមុន ហើយគ្រប់ផ្នែកនៃរាជធានីមានការអភិវឌ្ឍក្នុងល្បឿនយ៉ាងលឿន ជាក់ស្តែងភាគខាងជើងនៃទីក្រុងភ្នំពេញនៅតែជាតំបន់មួយដែលទទួលបានការចាប់អារម្មណ៍ច្រើនពីអ្នកវិនិយោគនានា។
អ្នកនាង អាន សុធីតា នាយិកាក្រុមហ៊ុន CBRE Cambodia បានថ្លែងឲ្យដឹងកាលពីថ្ងៃអង្គារថា បើធៀបនឹងតំបន់ដទៃទៀតនៅជុំវិញរាជធានីភ្នំពេញ ភាគខាងជើងទីក្រុងនេះជាតំបន់មានការអភិវឌ្ឍលឿន ជាងគេ ដោយសារតំបន់នេះមានសល់ដីទំនេរសម្រាប់អភិវឌ្ឍច្រើន ស្ថានភាពដីធ្លីខ្ពស់ មិនសូវប្រឈមមុខនឹងការលិចទឹក ជាទីតាំងដែលនៅជិតទីក្រុងជាងគេ និងជាតំបន់ដែលត្រូវរៀបចំហេដ្ឋារចនាសម្ព័ន្ធថ្មី ដែលអាចឲ្យការកសាងផ្លូវបានល្អជាងតំបន់ដែលបានអភិវឌ្ឍរួច។ លើសពីនេះតំបន់នេះក៏ស្ថិតនៅកៀកនឹងព្រលានយន្តហោះផងដែរ។
អ្នកនាងបន្តថា ៖ «តំបន់នេះមានការអភិវឌ្ឍបុរីយ៉ាងច្រើន ធ្វើឲ្យមានមនុស្សទៅរស់នៅច្រើន ដែលភាគច្រើនជាប្រជាជនមានជីវភាពកម្រិតមធ្យម»។
អ្នកនាងបន្តថា ៖ «តំបន់នេះនឹងមានសក្តានុពលខ្លាំងនាពេលអនាគត ដោយសារតម្លៃដីធ្លីនៅតំបន់នេះជាមធ្យមមានតម្លៃ៥០០ដុល្លារក្នុងមួយម៉ែត្រការ៉េប៉ុណ្ណោះ»។
តំបន់ភាគខាងជើងរាជធានីពិសេសនៅតាមបណ្តោយផ្លូវ ជា សុផារ៉ា មានបុរីរីកឡើងដូចផ្សិតក្នុងរយៈពេលប៉ុន្មានឆ្នាំចុងក្រោយនេះដូចជា ទីក្រុងរណប CAMKO បុរីពិភពថ្មី បុរីប៉េងហួត បុរីវិមានភ្នំពេញជាដើម។
លោក ហ៊ុយ វណ្ណា អគ្គលេខាធិការសមាគមអ្នកអភិវឌ្ឍន៍លំនៅឋានកម្ពុជាបានថ្លែងថា ប្រសិនជាពិនិត្យមើលគោលនយោបាយ និងប្លង់គោលអភិវឌ្ឍន៍រាជធានីរហូតដល់ឆ្នាំ ២០៣៥ រដ្ឋាភិបាលបានផ្តោតអភិវឌ្ឍនៅតំបន់នេះ ពិសេសនឹងមានការកសាងវិថីធំថ្មីមួយទៀតនៅតំបន់នេះ ក្រៅពីផ្លូវធំៗដែលព័ទ្ឋជុំវិញតំបន់នេះ ដូចជា ផ្លូវជាតិលេខ៥ ផ្លូវ ជា សុផារ៉ា ផ្លូវហាណូយ មហាវិថីអង្គរ និងផ្លូវធំមួយទៀតដែលកាត់ពីមុខបុរី Grand Phnom Penh។
លោកបន្តថា ៖ «មូលហេតុដែលប្រជាពលរដ្ឋមករស់នៅតំបន់នេះច្រើន ដោយសារតំបន់នេះមានបរិយាកាសល្អ ព្រោះមិនមានរោងចក្រដែលបង្កការបំពុលដោយផ្សែងអាប់អួ»។
លោកបន្តថា ៖ «តំបន់នេះក៏មានសន្តិសុខ សុវត្ថិភាពល្អប្រសើរផងដែរ ធៀបនឹងតំបន់ដទៃទៀត ពិសេសតំបន់នេះមានដីធំទូលាយ ដែលបង្កភាពងាយស្រួលក្នុងការអភិវឌ្ឍ»។
លោក LEE Seung Hyung អនុប្រធានជាន់ខ្ពស់នៃគម្រោងទីក្រុង CamKo បានលើកឡើងថា ការអភិវឌ្ឍនៅតំបន់ជុំវិញទីក្រុង CamKo ក្នុងខណ្ឌសែនសុខ និងប្ញស្សីកែវ ក៏កំពុងមានសកម្មភាពខ្លាំងក្លាគួរជាទីកត់សម្គាល់ផងដែរ។ នាពេលថ្មីៗនេះនៅភាគខាងលិចទីក្រុង CamKo អគារផ្សារទំនើប AEON Mall ទីពីរ បានចាប់ដំណើរការសាងសង់ហើយ ដែលនឹងបញ្ចប់ការសាងសង់ក្នុងឆ្នាំ ២០១៨។ នៅចុងភាគខាងជើងទីក្រុង CamKo មានសាលា Australian International School Phnom Penh (AISPP) ដ៏ល្បីល្បាញក៏នឹងបញ្ចប់ការសាងសង់ក្នុងពេលខាងមុខឆាប់ៗផងដែរ។
លោកបន្តថា ជាមួយនឹងការអភិវឌ្ឍទាំងក្នុងទីក្រុង CamKo និងតំបន់ជុំវិញនោះ ព្រមទាំងការពង្រីករាជធានីភ្នំពេញ យើងរំពឹងទុកថា នឹងបានឃើញ និងរីក រាយជាមួយនឹងការប្រែក្លាយតំបន់នេះជាទីក្រុងរណបតាមស្ដង់ដារអន្តរជាតិដូចដែលគម្រោងទីក្រុង CamKo បានរំពឹងទុកពីមុន។
លោកឧកញ៉ា លី ហួ អគ្គនាយកក្រុមហ៊ុន លីហួ គ្រុប និងជាប្រធានគម្រោងបុរីវិមានភ្នំពេញ ដែលបានធ្វើការបញ្ចុះបឋមសិលាសាងសង់គម្រោងទី៦ របស់ខ្លួននៅព្រឹកថ្ងៃទី ៥ តុលា នេះបានថ្លែងថា លោកនៅតែមានសុទិដ្ឋិនិយមអំពីទីផ្សារ និងការអភិវឌ្ឍនៅតំបន់នេះ ព្រោះជាតំបន់ដែលមានមនុស្សរស់នៅច្រើន និងមានហេដ្ឋារចនាសម្ព័ន្ធល្អប្រសើរ។
លោកបន្តថា ការចាប់ផ្តើមសាងសង់លំនៅឋានក្នុងគម្រោងទី ៦ នេះ គឺក្រុមហ៊ុនសាងសង់តម្រូវទៅតាមបែបមនុស្សស៊ីវីល័យ ព្រោះវាជាលំនៅឋានផ្ទះវីឡាសុទ្ធនេះ ធ្វើការសាងសងលើទំហំផ្ទៃដី ៣០០០ ម៉ែត្រការ៉េ សរុបផ្ទះចំនួន ១០៨ ផ្ទះ ក្នុងនោះក៏មានផ្សារ សួនច្បារ និងរោងភាពយន្តផងដែរ។
លោកឧកញ៉ា បានបន្តទៀតថា ៖ «គម្រោង ទី៦នេះ គឺជាលំនៅឋានដែលសាងសង់ឡើង តាមស្តង់ដារមានភាពធំទូលាយ រស់នៅដោយផាសុកភាព»។
លោកបន្តថា ៖ «គម្រោងនេះនឹងធ្វើការសាងសង់ប្រើប្រាស់រយៈពេល ១៨ ខែ ទើបបញ្ចប់រួចរាល់ ដែលផ្ទះទាំងនោះមានតម្លៃចាប់ពី ១៦៥.០០០ ដុលា្លរ រហូតដល់ ៦០ ម៉ឺនដុល្លារអាមេរិក»។
ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា លោក គីម ហ៊ាង បានថ្លែងថា នៅតំបន់ភាគខាងជើងរាជធានី សកម្មភាពទិញលក់ដីធ្លីនៅតែមានសកម្មភាពធម្មតា ដោយសារមានគម្រោងអភិវឌ្ឍន៍ថ្មីៗជាច្រើននៅតំបន់នេះ ហើយជាតំបន់ ដែលមានប្រជាពលរដ្ឋមានជីវភាពមធ្យមរស់នៅច្រើន ហេដ្ឋារចនាសម្ព័ន្ធមានភាពល្អប្រសើរ ពិសេសដីនៅតំបន់នេះបានឡើងថ្លៃខ្ពស់ចាប់តាំងពីគម្រោង AEON ទី ២ បានវិនិយោគនៅតំបន់នេះ។
លោកបានបន្តថា តម្លៃដីឡូត៍ទំហំ ២០គុណ៣០ម៉ែត្រ នៅភាគខាងជើងឆៀងខាងលិច មានតម្លៃចន្លោះពី ២០០ ទៅ ៥០០ ដុល្លារក្នុងមួយម៉ែត្រការ៉េ ប៉ុន្តែ បើដីទំហំធំៗមានតម្លៃក្រោមនេះ ៥០ ភាគរយ ផ្ទុយទៅវិញ ប្រសិនជាគិតនៅតាមផ្លូវធំៗ ដូចជា ផ្លូវហាណូយ ផ្លូវ១៩៨៦ (ផ្លូវសាលាលឹមកុកវិង) តម្លៃដីធ្លីស្ថិតក្នុងចន្លោះពី ១០០០ ទៅ ២០០០ ដុល្លារក្នុងមួយម៉ែត្រការ៉េ៕
http://www.postkhmer.com/